ଭାର୍ଗବୀ କୂଳରୁ ୧୫ଶହ ଶତାବ୍ଦୀ ପୂର୍ବର ମନ୍ଦିର ଭଗ୍ନାବଶେଷ ସନ୍ଧାନ
ଭାର୍ଗବୀ କୂଳରୁ ୧୫ଶହ ଶତାବ୍ଦୀ ପୂର୍ବର ମନ୍ଦିର ଭଗ୍ନାବଶେଷ ସନ୍ଧାନ
ONM_News
ଭାର୍ଗବୀ ନଦୀ କୂଳରୁ ୧୫ଶହ ଶତାବ୍ଦୀ ପୂର୍ବ କାଳର ପ୍ରାଚୀନ ମନ୍ଦିରର ଭଗ୍ନାବଶେଷ ମିଳିଛି। ସତ୍ୟବାଦୀ ବ୍ଲକ୍ ଆନନ୍ଦପୁର ଗ୍ରାମ ନିକଟରୁ ନଦୀ କୂଳର ଅଳ୍ପ ଦୂରରୁ ଏହି ଐତିହ୍ୟ କୀର୍ତ୍ତିରାଜିର ସନ୍ଧାନ କରାଯାଇଛି। ଏହି କାରୁକାର୍ଯ୍ୟ ବିମଣ୍ଡିତ ଶିଳାଟି ଏକ ମନ୍ଦିରର ଦ୍ବାରବନ୍ଧର ଉପର ଅଂଶ ଅବା ଅମଳକ ଶିଳା ବୋଲି ଗବେଷକମାନେ କହିଛନ୍ତି। ଶିଳାଖଣ୍ଡରେ ଖୋଦିତ କାରୁକାର୍ଯ୍ୟରୁ ଏହା ସୋମବଂଶୀ ରାଜାମାନଙ୍କର ରାଜୁତି ସମୟର ନିର୍ମିତ ମନ୍ଦିରର ଭଗ୍ନାବଶେଷ ବୋଲି ଅନୁମାନ କରାଯାଉଛି। ଐତିହ୍ୟ ଗବେଷଣାକାରୀ ସଂସ୍ଥା ଇଣ୍ଡିଆନ୍ ନ୍ୟାସନାଲ୍ ଟ୍ରଷ୍ଟ ଫର ଆର୍ଟ ଆଣ୍ଡ କଲଚରାଲ୍ ହେରିଟେଜ୍ (ଇନ୍ଟାକ୍) ଏହି ପ୍ରାଚୀନ ଭଗ୍ନାବଶେଷର ସନ୍ଧାନ କରିଛନ୍ତି।
ଇନ୍ଟାକ୍ କଟକ ଶାଖାର ଶ୍ରୀ ନାୟକ କହିଛନ୍ତି, ଏହି ଦ୍ବାରବନ୍ଧର ଉପର ଅଂଶ ବା ଅମଳକ ଶିଳାର ଲଲାଟରେ ଗଜଲକ୍ଷ୍ମୀଙ୍କ ପ୍ରତିମା ଖୋଦିତ ହୋଇଛି। ଉପରବନ୍ଧଟି ତିନି ଧାର ବିଶିଷ୍ଟ ହୋଇଥିବା ବେଳେ ଉପର ପଟରୁ ପ୍ରଥମ ଧାରରେ ଜଳପତ୍ର, ମଝିରେ ଗନ୍ଧର୍ବ ତଥା ବିଦ୍ୟାଧର ଓ ନିମ୍ନରେ ଡାଳି ଧାର ଚିତ୍ରଣ କରାଯାଇଛି। ସୋମବଂଶୀ ଓ ପୂର୍ବ ଗଙ୍ଗବଂଶୀମାନଙ୍କ ରାଜୁତି ସମୟରେ ଓଡ଼ିଶାରେ ଏଭଳି ମନ୍ଦିରର ଦ୍ବାରବନ୍ଧ ନିର୍ମିତ ହୋଇଥିବା ଦେଖିବାକୁ ମିଳିଥାଏ।
ସ୍ଥାନୀୟ ଅଞ୍ଚଳବାସୀ ନାରାୟଣ ପଣ୍ଡା କହିଛନ୍ତି, ଶିଳାଟି ପଡ଼ି ରହିଥିବା ସ୍ଥାନର ନାମ ପୂର୍ବେ ଶାସନବାଡ଼ି ଭାବେ ଜଣାଶୁଣା ଥିଲା। ଏହି ସ୍ଥାନରେ ଏକ ଗୋପୀନାଥ ମନ୍ଦିର ଥିବା କଥା ସେ ସେମାନଙ୍କର ପୂର୍ବଜମାନଙ୍କଠାରୁ ଶୁଣିଥିବା କହିଛନ୍ତି। ସମ୍ଭବତଃ ଭାର୍ଗବୀ ନଦୀରେ ବନ୍ୟା ଆସିବା ବେଳେ ସେଇ ପ୍ରାଚୀନ ମନ୍ଦିରଟି ଭାଙ୍ଗି ନଦୀ ଜଳରେ ଭାସି ଯାଇଥିଲା। ତେଣୁ ଆଜି ମଧ୍ୟ ନଦୀର ଆଖପାଖ ଅଞ୍ଚଳରୁ ସେହି ମନ୍ଦିରର ପୁରୁଣା ଶିଳାଖଣ୍ଡମାନ ମିଳୁଥିବା ସେ କହିଛନ୍ତି। ଶିଳାଖଣ୍ଡଟି ଗ୍ରାମ ଦାସସାହି ନିକଟରେ ତୁଳସୀ ଚଉରା ଭାବେ ବ୍ୟବହୃତ ହେଉଛି। ସେ ଆହୁରି ସୂଚନା ଦେଇଛନ୍ତି ଯେ କିଛି ବର୍ଷ ପୂର୍ବେ ଏଠାରୁ ଏକ ପ୍ରାଚୀନ ବୌଦ୍ଧ ମୂର୍ତ୍ତି ମଧ୍ୟ ଉଦ୍ଧାର କରାଯାଇ ନିକଟସ୍ଥ ବଳପୁର ବାଲୁଙ୍କେଶ୍ବର ମହାଦେବଙ୍କ ମନ୍ଦିରକୁ ସ୍ଥାନାନ୍ତର କରାଯାଇଥିଲା।
ଇନ୍ଟାକ୍ ଭୁବନେଶ୍ବର ଶାଖା ଆବାହକ ଶ୍ରୀ ଧୀର କହିଛନ୍ତି, ଭାର୍ଗବୀ ନଦୀ କୂଳସ୍ଥ ଗ୍ରାମମାନଙ୍କରେ ବହୁ ପ୍ରାଚୀନ ଐତିହ୍ୟ ଭଗ୍ନାବଶେଷ ଲୁକ୍କାୟିତ ଆଢ଼ୁଆଳରେ ରହିଛି। ରାଜ୍ୟ ପ୍ରତ୍ନତତ୍ତ୍ବ ବିଭାଗ ପକ୍ଷରୁ ଯଦି ଏହାର ଐତିହାସିକ ପୃଷ୍ଠଭୂମି ଜାଣିବା ଲାଗି ପ୍ରୟାସ କରାଯା’ନ୍ତା, ତେବେ ଓଡ଼ିଶା ଇତିହାସର ବହୁ ଅନାଲୋଚିତ ତଥ୍ୟ ଉନ୍ମୋଚିତ ହୋଇପାରନ୍ତା। ସ୍ଥାନୀୟ ଐତିହ୍ୟପ୍ରେମୀ ବିଶ୍ବରଂଜନ ମହାପାତ୍ର ଏହି ପ୍ରାଚୀନ କୀର୍ତ୍ତିରାଜି ଶିଳାଖଣ୍ଡ ବାବଦରେ ଇନ୍ଟାକ୍ ଭୁବନେଶ୍ବର ଶାଖାର ଆବାହକ ଅନିଲ ଧୀରଙ୍କୁ ସୂଚନା ଦେଇଥିଲେ। ଇନ୍ଟାକର ଐତିହ୍ୟ ଅନୁସନ୍ଧାନକାରୀ ଦଳ ସେଠାରେ ପହଞ୍ଚି ପ୍ରାଥମିକ ଅନୁଧ୍ୟାନ କରିଛନ୍ତି। ଗବେଷଣା ଦଳରେ ଇନ୍ଟାକ୍ କଟକ ଶାଖାର ସଦସ୍ୟ ଶ୍ରୀ ନାୟକଙ୍କ ସହିତ ଯୁବ ଐତିହ୍ୟପ୍ରେମୀ ସୁମନ ସ୍ବାଇଁ ଓ ବିକ୍ରମ କୁମାର ନାୟକ ସାମିଲ ହୋଇଥିଲେ।
