ମରିଗଲେ ସବୁ ମାଛ, ହତାଶ ମତ୍ସ୍ୟଜୀବି
ONM_News
ପାରାଦୀପ ଶିଳ୍ପାଞ୍ଚଳ ରେ ଏବେ ମତ୍ସ୍ୟଜୀବି ଙ୍କ ଉପରେ ଯେମିତିକି ଚଡ଼କ ପଡ଼ିଛି। ସକାଳୁ ସକାଳୁ ଉଠିଲା ମାତ୍ରେ ଖବର ମିଳୁଛି ଆଜି ଏ ନଦୀରେ ମାଛ ମରିକି ଭାସୁଛନ୍ତି ତ କାଲି ସେ ନଦୀ ରେ । ସେ ପୁଣି ଗୋଟିଏ କି ଯୋଡେ ନୁହେଁ କୁଢ଼ କୁଢ଼ ମଲା ମାଛ ମୁର୍ଦ୍ଦାର ହୋଇ ଭାସି ଭାସି କୂଳରେ ଲାଗୁଛନ୍ତି ଯାହାକୁ ଦେଖି ମତ୍ସ୍ୟଜୀବି ମାନେ ମୁଣ୍ଡରେ ହାତ ଦେଇ ବସୁଛନ୍ତି।ନିଜର ପରିବାର ଭରଣ ପୋଷଣ ସହ ନିଜର କୂଳ ବେଉଷା ଭାବରେ ଗ୍ରହଣ କରିଥିବା କର୍ତ୍ତବ୍ୟ କାହିଁ କେଉଁ କାଳରୁ ଏହି ମାଛ ବ୍ୟବସାୟ କରି ଆସୁଛନ୍ତି।କିନ୍ତୁ ଏବେ ଗତ କିଛି ବର୍ଷ ହେବ ଯେପରି ଅଚାନକ ନଦୀ ରେ ମାଛ ମରି ଭାସୁଛନ୍ତି ତାକୁ ଦେଖି ମତ୍ସ୍ୟଜୀବି ମାନଙ୍କ ମୁଣ୍ଡରେ ଚଡ଼କ ପଡ଼ିଲାଣି।
ଆଜି ସକାଳୁ ପିପିଏଲ୍ ସାର କାରଖାନା ରାସ୍ତା କଡ଼ରେ ଯାଇଥିବା ବଟ ନଦୀ ରେ ବିପୁଳ ପରିମାଣର ମାଛ ମରିକି ଭାସୁଛନ୍ତି ଯାହାକୁ ଦେଖିଲେ ଛାତି କୋରି ହେବା ପରି ଲାଗୁଛି। ଏହି ମାଛ ବିକି ଶତାଧିକ ମତ୍ସ୍ୟଜୀବି ପରିବାର ନିଜର ଗୁଜୁରାଣ ମେଣ୍ଟେଇ ଥାନ୍ତେ କିନ୍ତୁ କେହି ଦୁର୍ବୁର୍ତ୍ତ ବା ଶିଳ୍ପାନୁଷ୍ଠାନ ତାଙ୍କ ଚୁଲିରେ ଯେମିତି ପାଣି ପୁରାଇ ଦେଇଛି। ଏବେ ଏହି ନଦୀ ଉପରେ ନିର୍ଭର କରି ଚଳୁଥିବା ମତ୍ସ୍ୟଜୀବି ପରିବାର କରିବେ କଣ ? ଖାଇବେ କଣ ? ପିନ୍ଧିବେ କଣ ? ବଞ୍ଚିବେ କେମିତି ? ତାକୁ ନେଇ ଆବାଳ ବୃଦ୍ଧ ବନିତା ସମସ୍ତେ ଚିନ୍ତା ରେ ପଡ଼ିଛନ୍ତି।
ଲୋକେ ଏଥିପାଇଁ ନଦୀ ନିକଟରେ ଥିବା ଶୁଖୁଆ ବ୍ୟବସାୟୀ, ବାଲିଝରା ବସ୍ତି ବାସିନ୍ଦା, ବିଜୟଚନ୍ଦ୍ର ପୁର ବାସିନ୍ଦା, ତୈଳ କମ୍ପାନୀ ଓ ପରିଶେଷରେ ପିପିଏଲ୍ ସାର କାରଖାନା କୁ ଦାୟୀ କରୁଛନ୍ତି। ଯଦିଓ ଏନେଇ ସାଧାରଣ ମତ୍ସ୍ୟଜୀବି ମାନେ ମାଛ ମାରିବା ର ସଠିକ୍ ପ୍ରମାଣ ପାଇ ପାରୁ ନାହାଁନ୍ତି କି କେମିତି କଣ ରାତି ପାହିବା ପରେ ସକାଳୁ ଏ ମାଛ ମରିବା ର କାରଣ ମଧ୍ୟ ଜାଣି ପାରୁନାହାଁନ୍ତି ସେନେଇ ସମସ୍ତେ ମୁଣ୍ଡରେ ହାତ ଦେଇ ବସିଛନ୍ତି।
ସରକାର ପାରାଦୀପ ଶିଳ୍ପାଞ୍ଚଳ ରେ ଅନେକ ଶିଳ୍ପକୁ ଗୁରୁତ୍ୱ ଦେଇ ବିକାଶ ର ଡିଣ୍ଡିମ ପିଟୁଛନ୍ତି କିନ୍ତୁ ସେ ବିକାଶ ଟା ସ୍ଥାନୀୟ ପ୍ରାକୃତିକ ମତ୍ସ୍ୟ ସମ୍ପଦ ପାଇଁ ବିନାଶ ର ଦ୍ଵାର ଦେଶ ପାଲଟିଛି। ତେବେ ତୈଳ କମ୍ପାନୀ ର ଅଶୋଧିତ ତୈଳ, ପିପିଏଲ୍ ସାର କାରଖାନା ର ନିର୍ଗତ ଏସିଡ୍ ପାଣି, ଶୁଖୁଆ ଖଳାର ବିଷାକ୍ତ କେମିକାଲ ଓ ପରିଶେଷରେ ସ୍ଥାନୀୟ ଅଞ୍ଚଳରୁ ନିର୍ଗତ ବ୍ୟବହୃତ ଡ୍ରେନେଜ୍ ପାଣି, ଏସବୁ ଏହି ବଟ ନଦୀ ରେ ମିଶୁଛି। ଯେଉଁଥି ପାଇଁ ଏପରି ବହୁଳ ମାତ୍ରା ରେ ମାଛ ମରି ଭାସୁଛନ୍ତି।
ତେବେ ଏହାର ସ୍ଥାୟୀ ସମାଧାନ ପାଇଁ ସ୍ଥାନୀୟ ମତ୍ସ୍ୟଜୀବୀ ଦାବି କରୁଥିବା ବେଳେ ଏହି ମାଛ ମଡକ ର କାରଣ ଖୋଜି ପ୍ରକୃତ ଦୋଷୀ ଉପରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ମଧ୍ୟ ଦାବି କରିଛନ୍ତ l
