ବଦଳିଲେ ଫିରିଙ୍ଗିଆ IIC
ପୋଲିସ ଗଞ୍ଜେଇ କାରବାର କରୁଥିବା ଅଭିଯୋଗକୁ ନେଇ ଗତକାଲି ଫିରିଙ୍ଗିଆ ଥାନାରେ ଲଙ୍କାକାଣ୍ଡ ପରେ, ଆଜି ଥାନା ଆଇଆଇସିଙ୍କୁ ବଦଳି କରାଯାଇଛି
ONM_News
ପୋଲିସ ଗଞ୍ଜେଇ କାରବାର କରୁଥିବା ଅଭିଯୋଗକୁ ନେଇ ଗତକାଲି ଫିରିଙ୍ଗିଆ ଥାନାରେ ଲଙ୍କାକାଣ୍ଡ ପରେ, ଆଜି ଥାନା ଆଇଆଇସିଙ୍କୁ ବଦଳି କରାଯାଇଛି । ଥାନା ଆଇଆଇସି ତପନ ନାହକଙ୍କୁ କନ୍ଧମାଳ ଜିଲ୍ଲା ମୁଖ୍ୟାଳୟକୁ ବଦଳି କରାଯାଇଛି । ଏଥିସହ ଅଭିଯୋଗ ଥିବା ଦୁଇ ହାବିଲଦାରଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ହୋଇଛି । ଦୁଇ ହୋମଗାର୍ଡଙ୍କୁ କାର୍ଯ୍ୟରୁ ଅନ୍ତର କରାଯାଇଛି । ଏନେଇ ସୂଚନା ଦେଇଛନ୍ତି ଜିଲ୍ଲା ଏସପି ଶୁଭେନ୍ଦୁ ପାତ୍ର । ଥାନା ଆଇଆଇସି ଓ ହୋମଗାର୍ଡ ଗଞ୍ଜେଇ କାରବାରରେ ସମ୍ପୃକ୍ତ ଥିବା ଅଭିଯୋଗ କରିଥିଲେ ସ୍ଥାନୀୟ ଲୋକ । ଏପରିକି ପୋଲିସ ଗାଡିରେ ଗଞ୍ଜେଇ ନେଇ ବିକ୍ରି କରୁଥିବାର ଏକ ଭିଡିଓ ଏସପିଙ୍କୁ ପଠାଇଥିଲେ । କିନ୍ତୁ ଅଭିଯୁକ୍ତ ଆଇଆଇସି ଓ ତାଙ୍କ ସହଯୋଗୀଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନହେବାରୁ ଗତକାଲି ଥାନାରେ ଭଂଗାରୁଜା ଓ ପୋଡାଜଳା କରିଥିଲେ ଉତ୍ୟକ୍ତ ଲୋକେ । ଗାଡିରେ ନିଆଁ ଲଗାଇ ଦେଇଥିଲେ ।
ଅନ୍ୟପଟେ, ଫିରିଙ୍ଗିଆ ଥାନା ପୋଡି ଓ ପୋଲିସକୁ ମାଡ ଘଟଣାରେ ଆକ୍ସନ ମୋଡକୁ ଆସିଛି ପୋଲିସ । ଲଙ୍କାକାଣ୍ଡ ଘଟାଇଥିବା ଅଭିଯୋଗରେ ୩୦ଜଣଙ୍କ ବିରୋଧରେ ମାମଲା ରୁଜୁ ହୋଇଛି । ୧୬ଜଣଙ୍କୁ ଉଠାଇ ନେଇଛି ପୋଲିସ୍ । ସେମାନଙ୍କୁ ଅଟକ ରଖି ପଚରାଉଚୁରା ଚାଲିଛି । ସେପଟେ ଗିରଫ ଭୟରେ ପୁରୁଷଶୂନ୍ୟ ହୋଇପଡ଼ିଛି ଫିରିଙ୍ଗିଆ ଗାଁ । ବନ୍ଦ ରହିଛି ଫିରିଙ୍ଗିଆ ଦୋକାନ ବଜାର । ଅଞ୍ଚଳରେ ଚାପା ଉତେଜନା ଲାଗି ରହିଥିବାରୁ ୧୪୪ ଧାରା ଲାଗୁ କରାଯାଇଛି । ଗତକାଲି ଅପରାହ୍ନରେ ଲୋକ ଥାନାରେ ବ୍ୟାପକ ଭଙ୍ଗାରୁଜା କରିବା ସହ ଥାନାରେ ନିଆଁ ଲଗାଇ ଦେଇଥିଲେ । ପୋଲିସ ଗାଡିରେ ଗଞ୍ଜେଇ ଚାଲାଣ ଅଭିଯୋଗ କରି ଥାନାରେ ନିଆଁ ଲଗାଇ ଦେଇଥିଲେ ସ୍ଥାନୀୟ ଲୋକେ ।
