ଦେବ ଦୀପାବଳୀ ରେ ମହାପ୍ରଭୁଙ୍କ ମହାଶ୍ରାଦ୍ଧ ବେଶ

ଆଜି ପବିତ୍ର ଦେବ ଦୀପାବଳୀ ମହାପ୍ରଭୁ ଶ୍ରୀଜଗନ୍ନାଥ ମାନବମାନଙ୍କ ଭଳି ପିତୃପୁରୁଷଙ୍କ ଉଦ୍ଦେଶ୍ୟରେ ତିନି ଦିନ ଦୀପଦାନ କରନ୍ତି । ମାର୍ଗଶୀର କୃଷ୍ଣ ଚତୁର୍ଦଶୀ ଦିନ ଅଦିତି ଓ କଶ୍ୟପଙ୍କ ଉଦ୍ଦେଶ୍ୟରେ, ଅମାବସ୍ୟା ଦିନ ରାଜା ଦଶରଥ, କୌଶଲ୍ୟାଙ୍କ ଉଦ୍ଦେଶ୍ୟରେ, ପ୍ରତିପଦା ଦିନ ବସୁଦେବ, ଦେବକୀ, ନନ୍ଦ, ଯଶୋଦା, ଇନ୍ଦ୍ରଦ୍ୟୁମ୍ନ ଓ ଗୁଣ୍ଡିଚା ଦେବୀଙ୍କ ଉଦ୍ଦେଶ୍ୟରେ ପ୍ରଦୀପ ଉତ୍ସର୍ଗ କରନ୍ତି । ପ୍ରଥମ ଦିନରୁ ଦୀପାବଳି ଉତ୍ସବ ଆରମ୍ଭ ହୋଇ ତୃତୀୟ ଓ ଶେଷ ଦିନରେ ଶେଷ ଦୀପାବଳି ଉତ୍ସବ ପାଳନ କରାଯାଏ । ଆଜିଠାରୁ ୩ ଦିନ ଧରି ମହାପ୍ରଭୁ ତାଙ୍କ ପିତୃ ପିତାମହ ଆଦିଙ୍କ ଉଦ୍ଦେଶ୍ୟରେ ଶ୍ରାଦ୍ଧ ଉତ୍ସର୍ଗ କରନ୍ତି । ଏହି ଦିନରେ ମହାପ୍ରଭୁ ଶ୍ରୀଜଗନ୍ନାଥଙ୍କ ଶ୍ରାଦ୍ଧ ବେଶରେ ଭକ୍ତଙ୍କୁ ଦର୍ଶନ ଦେଇଥାନ୍ତି ।

ଶ୍ରୀମନ୍ଦିରରେ ପାଳିତ ହେଉଛି ଦେବ ଦୀପାବଳି, ଦୀପମୟ ଶ୍ରୀମନ୍ଦିର ସିଂହଦ୍ଵାର

ପୁରୀ: ଆଜି ମାର୍ଗଶୀର କୃଷ୍ଣ ଚତୁର୍ଦ୍ଦଶୀ ତିଥି ଅବସରରେ ପାଳିତ ହେଉଛି ଦେବଦୀପାବଳି। ଏହି ଅବସରରେ ଦୀପମୟ ହୋଇଛି ଶ୍ରୀମନ୍ଦିର ସିଂହଦ୍ଵାର। ଶ୍ରୀଜଗନ୍ନାଥ ସେବା ସଂସ୍ଥାନ ପକ୍ଷରୁ ଶ୍ରୀମନ୍ଦିର ସିଂହଦ୍ଵାର ଠାରେ ଅନୁଷ୍ଠିତ ହୋଇଛି ଦୀପଦାନ ମହୋତ୍ସବ। ବିଶ୍ଵଶାନ୍ତି ଓ ବିଶ୍ବ କଲ୍ୟାଣ ସ୍ଥାପନା ଉଦ୍ଦେଶ୍ୟରେ ଶ୍ରୀଜଗନ୍ନାଥ ସେବା ସଂସ୍ଥାନ ପକ୍ଷରୁ ଶ୍ରୀମନ୍ଦିର ସିଂହଦ୍ଵାର ସମେତ ଓଡ଼ିଶାର ସମସ୍ତ ମନ୍ଦିରରେ ଦୀପଦାନ କରାଯାଇଛି।

ତେବେ ଆଜିଠାରୁ ଶ୍ରୀମନ୍ଦିରରେ ଦେବଦୀପାବଳି ପାଳନ ହେଉଥିବା ବେଳେ ମହାପ୍ରଭୁ ନିଜ ପିତୃପୁରୁଷଙ୍କ ଉଦ୍ଦେଶ୍ୟରେ ଶ୍ରାଦ୍ଧ ପ୍ରଦାନ ସହ ଦୀପଦାନ କରିଥାନ୍ତି। ତେଣୁ ଏହି ତିନିଦିନ ମହାପ୍ରଭୁଙ୍କ ଉଦ୍ଦେଶ୍ୟରେ ପ୍ରତ୍ୟେକ ଭକ୍ତ ନିଜ ନିଜ ଘରେ ଦୀପଟିଏ ପ୍ରଜ୍ବଳନ କରିବା ପାଇଁ ସଂସ୍ଥାନ ପକ୍ଷରୁ ଆହ୍ବାନ କରାଯାଇଛି।

ପ୍ରଥମ ଦିବସ – ମହାପ୍ରଭୁ ଅଦିତି ଓ କଶ୍ୟପଙ୍କୁ ଶ୍ରାଦ୍ଧ ଦେଇଥାନ୍ତି । ଅଦିତି ଦକ୍ଷ ପ୍ରଜାପତିଙ୍କ କନ୍ୟା । ମହର୍ଷି କଶ୍ୟପ ଏହାଙ୍କ ସ୍ଵାମୀ । ଇନ୍ଦ୍ରାଦି ଦେବତାମାନେ ଓ ବାମନ ଅବତାରରେ ବିଷ୍ଣୁ ଅଦିତି ଗର୍ଭରୁ ଜନ୍ମ ହୋଇଥିବାରୁ ଅଦିତି-କଶ୍ୟପ ଭଗବାନଙ୍କ ପିତାମାତା । ମହାପ୍ରଭୁ ଶ୍ରୀଜଗନ୍ନାଥଙ୍କ ଏମାନଙ୍କୁ ଶ୍ରାଦ୍ଧ ଦିଅନ୍ତି ।

ଶ୍ରୀମନ୍ଦିରରେ ମାର୍ଗଶୀର କୃଷ୍ଣ ଚତୁର୍ଦ୍ଦଶୀ ତିଥିରେ ଦେବ ଦୀପାବଳୀ ନୀତି ପାଳିତ ହୋଇଥାଏ । ସଂଧ୍ୟାଧୂପ ଆଳତୀ ଶେଷ ହେବା ପରେ ଶୁଦ୍ଧ ସୁଆରଙ୍କ ଦ୍ୱାରା ସିଂହାସନ ତଳେ ଧୁଆଧୋଇ ହୋଇ ପୋଛା ମରାଯାଇଥାଏ । ପରେ ଭଣ୍ଡାର ମେକାପ ଚାଉଳରେ ବୃକ୍ଷ ରଚନା କରିଥାନ୍ତି । ବଡ଼ ବାଡ଼ ଓ ମଝି ବାଡ଼ରେ ୯ଟି ତଥା ମହାପ୍ରଭୁ ବାଡ଼ରେ ୧୦ଟି ଦୀପ ରଖାଯାଏ । ଏହାପରେ ପରେ ପାଳିଆ ମେକାପ ବଇଠାରେ ଗବ୍ୟ ଘୃତ ଦେଇ ଗଛମାନଙ୍କରେ ବତୀ ଲାଗେଇଥାନ୍ତି ।

ପରମ୍ପରା ଅନୁଯାୟୀ, ୩ଟି ସୁନା କାଠି ଆଳତି ଲଗାଯାଏ । ଏହାପରେ ପୂଜାପଣ୍ଡା, ପତି ମହାପାତ୍ର, ମୁଦିରସ୍ତଙ୍କ ଦ୍ଵାରା ବନ୍ଦାପନା ନୀତି ବଢିଥାଏ । ବନ୍ଦାପନା ସରିବା ପରେ ୩ଜଣ ପାଳିଆ ପୂଜାପଣ୍ଡା ମହାଦୀପ ଆଳତି କରିଥାନ୍ତି ଓ ଜୟ ବିଜୟ ଦ୍ୱାର ନିକଟରେ ପାଳିଆ ପ୍ରତିହାରୀ କରିଥିବା ଚାଉଳ ଗଛକୁ ଜଣେ ପୂଜା ପଣ୍ଡା ୩ଟି ଗଛରେ ୩ ଟି ମହାଦୀପ ରଖି ସଂସ୍କାର କରିଥାନ୍ତି । ପରେ ୩ଜଣ ପୂଜାପଣ୍ଡା ଉକ୍ତ ମହାଦୀପକୁ ଆଣି ପାଳିଆ ଚୂନରା ହାତରେ ଦେଇଥାନ୍ତି । ପାଳିଆ ଚୂନରା ତେଲ ଓ ଘିଅ ନେଇ ମନ୍ଦିର ଉପରେ ୩ଟି ଦୀପମାନ ଲଗାଇଥାନ୍ତି ।

ମହାପ୍ରଭୁଙ୍କ ଏହି ଦୀପ ଦାନ ସମୟରେ ଏକ ସ୍ୱତନ୍ତ୍ର ବେଶ ହୋଇଥାଏ । ଏହା ଶ୍ରାଦ୍ଧ ବେଶ ନାମରେ ପରିଚିତ । ପୁଷ୍ପାଳକ ସେବକମାନେ ଶ୍ରୀଜୀଉମାନଙ୍କୁ ନାଗପୁରୀ ଶାଢ଼ୀ ଚାଦରରେ ଶ୍ରାଦ୍ଧ ବେଶରେ ଭୂଷିତ କରିଥାନ୍ତି । ଏଥିରେ ଶ୍ରୀଜୀଉମାନେ ଧବଳ ବସ୍ତ୍ର ପରିହିତ ହୋଇଥାନ୍ତି । କିନ୍ତୁ, ପ୍ରତି ଠାକୁରଙ୍କ ଲୁଗାର ଧଡି ଗୁଡିକ ଭିନ୍ନ ରଙ୍ଗର ହୋଇଥାଏ । ମହାପ୍ରଭୁ ଶ୍ରୀଜଗନ୍ନାଥଙ୍କୁ ସୂତାଶାଢ଼ି (ନାଗପୁରୀ ଶାଢ଼ି) ଲାଗି ହେଉଥିବା ଧଳା ବସ୍ତ୍ରର ଧଡ଼ିର ରଙ୍ଗ ହଳଦିଆ । ବଡ଼ ଠାକୁର ଶ୍ରୀବଳଭଦ୍ରଙ୍କୁ ସୂତାଶାଢ଼ି (ନାଗପୁରୀ ଶାଢ଼ି) ଲାଗି ହେଉଥିବା ଧଳା ବସ୍ତ୍ର ର ଧଡ଼ି ନୀଳ । ମା’ ସୁଭଦ୍ରାଙ୍କୁ ସୂତାଶାଢ଼ି (ନାଗପୁରୀ ଶାଢ଼ି) ଲାଗି ହେଉଥିବା ଧଳା ବସ୍ତ୍ରର ଧଡିର ରଙ୍ଗ ନାଲି ବର୍ଣ୍ଣର ହୋଇଥାଏ ।

ଶ୍ରୀଜୀଉମାନଙ୍କ ତ୍ରିମୁଣ୍ଡିରେ ଶ୍ରୀକପଡ଼ାରେ ଆବୃତ କରାଯାଇଥାଏ । ଚାଦରଟି ଶ୍ରୀଭୁଜରେ ପ୍ରସାରି ଥାଏ । ଏହି ବେଶରେ ଶ୍ରୀଜୀଉମାନେ ତଦଗୀ, କୁଣ୍ଡଳ, ନଳି ଭୁଜ, ଚନ୍ଦ୍ର ସୂର୍ଯ୍ୟ, ଆଡ଼କାନି, କମରପଟି, ହରିଡ଼ା ମାଳି ଆଦି ସ୍ବର୍ଣ୍ଣ ଅଳଙ୍କାର ପରିଧାନ କରିଥାନ୍ତି ।