ଚୋରା କୋକେନ୍ ଜାହାଜ ଦେବୀକୁ ବାନ୍ଧିକି ରଖ
ହାଇକୋର୍ଟଙ୍କ କଡ଼ା ଆଭିମୁଖ୍ୟ , କୌଣସି ହାଲତରେ ଛଡ଼ା ଯିବ ନାହିଁ
Onm
ମାମଲାର ବିବରଣୀରୁ ପ୍ରକାଶ ଯେ ଆବେଦନକାରୀ ସଂସ୍ଥାର ବର୍ଥରେ ଏମ.ଭି.ଦେବୀ ନିର୍ଦ୍ଧାରିତ ସମୟ ଠାରୁ ଅଧିକ ଦିନ ରହିବା ବାବଦ ଦେୟକୁ ନେଇ ଏହି ମାମଲା ହାଇକୋର୍ଟରେ ଦାୟର ହୋଇଛି। ଏଥିରେ ଏମ.ଭି.ଦେବୀ ନିକଟରୁ ୭ କୋଟି ୯୫ ଲକ୍ଷ ୪୭ ହଜାର ୧୭୦ ଟଙ୍କା ଆଦାୟ କଥା ଉଲ୍ଲେଖ କରାଯାଇଛି। ଆହୁରି କୁହାଯାଇଛି, ବର୍ଥ ଭଡା, ଜରିମାନା, ସୁଧ, ଆଇନଗତ ବ୍ୟୟ ଓ ଅନ୍ୟାନ୍ୟ ପ୍ରାପ୍ୟ ବାବଦରେ ଉପରୋକ୍ତ ଅର୍ଥ ରାଶି ଜାହାଜରୁ ଆବେଦନକାରୀ ସଂସ୍ଥା ପାଇବା କଥା। ମୂଳ ମାମଲା ବିଚାରାଧୀନ ଥିବା ବେଳେ ଆଡମିରାଲ୍ଟି (ଜୁରିସଡିକ୍ସନ୍ ଆଣ୍ଡ ସେଟେଲମେଣ୍ଟ ଅଫ୍ ମାରିଟାଇମ୍ କ୍ଲେମ୍ସ) ଆଇନ ୨୦୧୭ ଅନୁସାରେ ଜାହାଜକୁ ଆରେଷ୍ଟ କରାଯାଉ ବୋଲି ଅନ୍ତରୀଣ ଆବେଦନରେ ଉଲ୍ଲେଖ କରାଯାଇଥିଲା। ଫେବ୍ରୁଆରି ୨୧ରେ ହାଇକୋର୍ଟ ଅନ୍ତରୀଣ ଆବେଦନର ଶୁଣାଣି ଶେଷ କରି ରାୟ ସଂରକ୍ଷିତ ରଖିଥିଲେ। ମାମଲାର ଶୁଣାଣି ସମୟରେ ସ୍ପଷ୍ଟ ହୋଇଥିଲା ଯେ ପାରାଦୀପ ବନ୍ଦରକୁ ଆସିଥିବା ଜାହାଜ ଏମ.ଭି.ଦେବୀରୁ ୨୦୨୩, ନଭେମ୍ବର ୩୦ ରାତି ଓ ଡିସେମ୍ବର ୧ରେ ୨୨ଟି ପ୍ୟାକେଟରେ ଥିବା କୋକେନ ଜବତ ହୋଇଥିଲା।
