ନବ ତାତି ରେ ଗୃହ ଭିତର ବାହାର ସୁଲୁସୁଲୁ
ବିରୋଧୀ ଙ୍କ ବିରୋଧରେ କମ୍ପୁଛି ଗୃହ
Onm
ଭୁବନେଶ୍ବର : ପୂର୍ବତନ ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କ ହତ୍ୟା ପ୍ରସଙ୍ଗକୁ ନେଇ ତାତି ଥମୁନାହିଁ। ଗୃହ ଭିତରେ ଓ ବାହାରେ ବିରୋଧୀ ସରକାରଙ୍କୁ ପ୍ରଶ୍ନବାଣରେ ଘାଇଲା କରିବାକୁ ଉଦ୍ୟମ କରୁଥିବାବେଳେ ସରକାରୀ ଦଳ ପକ୍ଷରୁ ଏହାର କଡ଼ା ଜବାବ ରଖାଯାଇଛି।
ଆଜି ଶୂନ୍ୟକାଳରେ ଗୃହରେ ନବଙ୍କ ହତ୍ୟାକାଣ୍ଡ ପ୍ରସଙ୍ଗ ଉଠାଇ କଂଗ୍ରେସ ବିଧାୟକ ତାରା ପ୍ରସାଦ ବାହିନୀପତି କହିଥିଲେ ଯେ, ଗୃହ ଏବେ ଖାଲି ଖାଲି ଲାଗୁଛି। ପ୍ରଥମେ କଂଗ୍ରେସରେ ସେ ଥିଲେ ଏବଂ ପରେ ବିଜେଡିରେ ମିଶିବା ପରେ ମନ୍ତ୍ରୀ ହୋଇଥିଲେ। ତାଙ୍କ ହତ୍ୟାକାଣ୍ଡ ନେଇ ପ୍ରତିଦିନ ବିଭିନ୍ନ ପ୍ରକାର ଖବର ଶୁଣିବାକୁ ମିଳୁଛି। ମନ୍ତ୍ରୀ ନବ ଦାସଙ୍କୁ ଯୋଜନାବଦ୍ଧ ଭାବେ ହତ୍ୟା କରାଯାଇଛି। ଏହି ଘଟଣାରେ ବିଜେପି କହୁଛି ସିବିଆଇ, ଆମେ କହୁଛୁ ଏସଆଇଟି ତଦନ୍ତ ହେଉ। ହେଲେ ସରକାର କ୍ରାଇମବ୍ରାଞ୍ଚର ତଦନ୍ତ କରୁଛନ୍ତି। ତାହା ଲୋକଙ୍କ ହୃଦୟକୁ ଛୁଉଁ ନାହିଁ। ଗୋପାଳ କେବଳ ପାଗଳ କି ନୁହେଁ ତାହା ତଦନ୍ତ ହେଉଛି, କିନ୍ତୁ ସେ କାହିଁକି ନବ ଦାସଙ୍କୁ ମାରିଲା ତାହା ତଦନ୍ତ ହେଉନି। ଏ ନେଇ ଗୃହ ରାଷ୍ଟ୍ରମନ୍ତ୍ରୀ ବିଧାନସଭାରେ ଥରକୁ ଥର ତଥ୍ୟ ଉପସ୍ଥାପନ କରିବାକୁ ବାଚସ୍ପତିଙ୍କଠାରୁ ସେ ରୁଲିଂ ଦାବି କରିଥିଲେ।
ବିଧାୟକ ସନ୍ତୋଷ ସିଂହ ସାଲୁଜା କହିଥିଲେ ଯେ, ହତ୍ୟାକାଣ୍ଡକୁ ୩୦ ଦିନ ବିତିବ; କିନ୍ତୁ କ୍ରାଇମବ୍ରାଞ୍ଚ ଏପର୍ଯ୍ୟନ୍ତ କୌଣସି ଟେର ପାଉନି। କ୍ରାଇମବ୍ରାଞ୍ଚ ଉପରେ ଆଉ ଭରସା ନାହିଁ। କାହିଁକି ହତ୍ୟା ହୋଇଛି
ରାଜନୈତିକ ଉଦ୍ଦେଶ୍ୟ ନା ବ୍ୟବସାୟିକ ହତ୍ୟା ତାହା ସନ୍ଦେହଘେରରେ। ଖାକିର ତଦନ୍ତ ଖାକି କିପରି କରିବ ? ନବ ଦାସଙ୍କ କକା କହିଛନ୍ତି ଷଡ଼ଯନ୍ତ୍ର ହୋଇଛି, ଏପରିକି ସରକାର ଅର୍ଥାତ ରାଜସ୍ୱ ମନ୍ତ୍ରୀ ମଧ୍ୟ କହିଛନ୍ତି ଷଡ଼ଯନ୍ତ୍ର ହୋଇଛି। ତାଙ୍କ ସାମ୍ରାଜ୍ୟକୁ ଦଖଲ ପାଇଁ, ବର୍ତ୍ତମାନ ସେଠି ଗଣ୍ଡଗୋଳ ହେଉଛି। ଭଟଲି ବିଧାୟକ ସୁଶାନ୍ତ ସିଂ ଓ ମନ୍ତ୍ରୀ ନବ ଦାସଙ୍କ ଗୋଷ୍ଠୀ ମଧ୍ୟରେ ଗଣ୍ଡଗୋଳ ଚାଲିଛି। ତେଣୁ ନବ ଦାସଙ୍କ ହତ୍ୟାକାଣ୍ଡରେ ଭଟ୍ଟଲି ବିଧାୟକଙ୍କୁ ତଦନ୍ତ ପରିସରଭୁକ୍ତ କରଯାଉ ବୋଲି ସେ ଦାବି କରିଥିଲେ।
ସେହିପରି ବିଜେପି ବିଧାୟକ ସୁବାସ ପାଣିଗ୍ରାହୀ ସରକାରଙ୍କୁ ପ୍ରଶ୍ନ କରିଛନ୍ତି ଯେ, ମନ୍ତ୍ରୀ ନବ ଦାସଙ୍କ ହତ୍ୟାକାଣ୍ଡକୁ ମାସେ ବିତିବାକୁ ଯାଉଛି; କିନ୍ତୁ ତଦନ୍ତ କେବଳ ଗୋପାଳ ପାଖରେ ସୀମିତ ରହିଛି। ଗୋପାଳକୁ ପାଗଳ ସାବ୍ୟସ୍ତ କରିବା ପାଇଁ ବିଭିନ୍ନ ଜାଗାକୁ ନିଆଯାଉଛି। ଘଟଣାର ସିବିଆଇ ତଦନ୍ତ ହେଲେ ପ୍ରକୃତ ସତ୍ୟ ଲୋକଲୋଚନକୁ ଆସିବ।
ଅନ୍ୟପକ୍ଷରେ ବିଜେଡି ବିଧାୟକ ଭାଗୀରଥି ସେଠୀ କହିଛନ୍ତି ଯେ, ବିରୋଧୀ ଅଭିଯୋଗ କରିବେ ତାଙ୍କ କର୍ମ ସେ କରୁଛନ୍ତି। ନବ ଦାସଙ୍କ ହତ୍ୟା କ୍ରାଇମବ୍ରାଞ୍ଚକୁ ଦିଆଯାଇଛି। ତଦନ୍ତ ସରିବା ପରେ ଫଳାଫଳ ଯାହା ବାହାରିବ। ବର୍ତ୍ତମାନ ମୁଖ୍ୟମନ୍ତ୍ରୀ କେନ୍ଦ୍ର ସରକାରଙ୍କ ଗୃହ ବିଭାଗକୁ ଚିଠି ଲେଖି ‘ଏଫବିଆଇ’ର ସହାୟତା ଲୋଡିଛନ୍ତି। ସେ କହିଛନ୍ତି ଯେ, ଭଟ୍ଟଲି ବିଧାୟକ ଜଣେ ଅମାୟିକ ଲୋକ। ବିରୋଧୀ କେବଳ ଅନ୍ଧାରରେ ବାଡ଼ି ବୁଲାଉଛନ୍ତି।
ଅପରପକ୍ଷରେ ରାଜଧାନୀ ଭୁବନେଶ୍ୱରରେ ପୂର୍ବତନ ସ୍ୱାସ୍ଥ୍ୟ ମନ୍ତ୍ରୀ ନବ ଦାସଙ୍କ ହତ୍ୟା ପ୍ରସଙ୍ଗରେ ବିଜେପି ଯୁବମୋର୍ଚ୍ଚା ପକ୍ଷରୁ ବିଶାଳ ରାଲି ମଙ୍ଗଳବାର କରାଯାଇଛି। ଲୋୟର ପିଏମଜିରେ ଯୁବ ମୋର୍ଚ୍ଚାର ରାଲି କରାଯାଉଥିବା ବେଳେ ନବ ଦାସଙ୍କ ହତ୍ୟା ଓ ଆଇନ ଶୃଙ୍ଖଳା ବିପର୍ଯ୍ୟସ୍ତ ପ୍ରତିବାଦରେ ରାଲି କରାଯାଉଛି। ତେବେ ପରିସ୍ଥିତିକୁ ନିୟନ୍ତ୍ରଣ ପାଇଁ ବ୍ୟାପକ ପୁଲିସ ମୁତୟନ କରାଯାଇଥିବା ବେଳେ ପୁଲିସ-ବିଜେପି ଯୁବ ମୋର୍ଚ୍ଚା ମଧ୍ୟରେ ଧସ୍ତାଧସ୍ତି ପରିସ୍ଥିତି ସୃଷ୍ଟି ହୋଇଛି। ରାଲିରେ ରାଜ୍ୟର ସବୁ ଜିଲାର ଯୁବ ମୋର୍ଚ୍ଚା ସଦସ୍ୟମାନେ ଏଥିରେ ସାମିଲ ହୋଇଛନ୍ତି ବୋଲି ସୂଚନା ମିଳିଛି।
ବିଶାଳ ରାଲି ସହ ବିଜେପି ଯୁବ ମୋର୍ଚ୍ଚା ବିଧାନସଭା ଘେରାଉ କରିଥିଲେ। ଭିତରକୁ ଯିବାକୁ ଉଦ୍ୟମ କରିବା ସମୟରେ ପୁଲିସ ଅଟକାଇବାକୁ ପ୍ରୟାସ କରିଥିଲା। ଏହାପରେ ପୁଲିସ–ବିଜେପି ଯୁବ ମୋର୍ଚ୍ଚା କର୍ମୀଙ୍କ ମଧ୍ୟରେ ଧସ୍ତାଧସ୍ତି ସହ ଲାଠି ମାଡ ହୋଇଛି। ଏଥିରେ କିଛି ପୁଲିସ ଓ ବିଜେପି କର୍ମୀ ଆହତ ହୋଇଛନ୍ତି। ଲୋୟର ପିଏମଜି ଏକ ପ୍ରକାର ରଣକ୍ଷେତ୍ରରେ ପରିଣତ ହୋଇଛି।
