ସବ୍ୟସାଚୀଙ୍କ ନୂଆ ସିନେମା 'ରାଣ୍ଡୀପୁଅ ଅନନ୍ତା'
ଓଲିଉଡ୍ ଚକୋଲେଟ୍ ବୟ ସବ୍ୟସାଚୀ ମିଶ୍ରଙ୍କ ଆଉ ଏକ ମୌଳିକ କାହାଣୀ ଭରା ନୂଆ ଓଡ଼ିଆ ସିନେମାର ଶୀର୍ଷକ ଘୋଷଣା ହୋଇଛି
ONM_News
ଓଲିଉଡ୍ ଚକୋଲେଟ୍ ବୟ ସବ୍ୟସାଚୀ ମିଶ୍ରଙ୍କ ଆଉ ଏକ ମୌଳିକ କାହାଣୀ ଭରା ନୂଆ ଓଡ଼ିଆ ସିନେମାର ଶୀର୍ଷକ ଘୋଷଣା ହୋଇଛି । 'ପୁଷ୍କରା' ପରେ ଏକ ନୂଆ ସିନେମା ଆସିବା ନେଇ ଦର୍ଶକଙ୍କୁ ସବୁବେଳେ ବିଭିନ୍ନ ଭିଡିଓ ଦେଖାଇ ଆଶ୍ଚର୍ଯ୍ୟ ଚକିତ କରୁଥିବା ସବ୍ୟସାଚୀ ଶେଷରେ ନୂଆ ସିନେମା 'ରାଣ୍ଡୀପୁଅ ଅନନ୍ତା'ର ଫାଷ୍ଟ୍ ଲୁକ୍ ସୋସିଆଲ୍ ମିଡିଆରେ ଛାଡ଼ି ସତସତିକା ଆଶ୍ଚର୍ଯ୍ୟ କରିଦେଇଛନ୍ତି ।
ତାଙ୍କୁ ପଚାରିବାରୁ ସେ କହିଛନ୍ତି, ଏହି ସିନେମା ଲାଗି ଗତ ୬ ମାସରେ ୭୫ କେଜିରୁ ଓଜନ ବଢ଼ାଇ ୧୦୩ କେଜି କରିଛି । ଆସନ୍ତା ୩୦ ଦିନ ଧରି ସିନେମାର ସୁଟିଂ ଚାଲିବ । ଅନ୍ତତଃପକ୍ଷେ ସେତକ ଦିନ ପର୍ଯ୍ୟନ୍ତ ଏହିଭଳି ବଳିଷ୍ଠ ଚେହେରା ଧରି ବୁଲିବାକୁ ପଡ଼ିବ । ସୋସିଆଲ୍ ମିଡିଆରେ ଫାଷ୍ଟ ଲୁକ୍ ସହ ସବ୍ୟସାଚୀ ଉଲ୍ଲେଖ କରିଛନ୍ତି, ‘ମୋ ନୂଆ ସିନେମା ମୋ ନୂଆ ପରିଚୟ ହେଉ, ସେତିକି ପ୍ରାର୍ଥନା । ଏହି ଅନନ୍ତା ଚରିତ୍ର ପାଇଁ ଅନେକ ମାସରୁ ପେଟ ବଢ଼ାଉଥିଲି ଓ ପେଟ ଭିତରେ ଏହି ସିନେମା ବିଷୟ ଲୁଚେଇ ରଖିଥିଲି । ଆପଣଙ୍କୁ ଜଣାଇନଥିଲି । ଏକାଥରେ ଫାଷ୍ଟ ଲୁକ୍ରେ ଆପଣଙ୍କୁ ସର୍ପ୍ରାଇଜ୍ ଦେବାର ଇଚ୍ଛା ଥିଲା । ଆଶା ଆପଣଙ୍କୁ ମୋ ଲୁକ୍ ମାଧ୍ୟମରେ ତାହା ଦେଇପାରିଛି । ମୋ ଭାଗ୍ୟରେ ଥିଲା ବୋଲି ଓଡ଼ିଶାର ବରପୁତ୍ର ବ୍ୟାସକବି ଫକୀରମୋହନ ସେନାପତିଙ୍କ ବଳିଷ୍ଠ କାହାଣୀ ଉପରେ ଚଳଚ୍ଚିତ୍ର କରିବାର ସୁଯୋଗ ପାଇଲି । ତାହା ପୁଣି ଅନେକ ଜାତୀୟ ପୁରସ୍କାର ଓଡ଼ିଶାକୁ ଆଣିଥିବା ଆମ ପ୍ରିୟ ଓ ପ୍ରସିଦ୍ଧ ନିର୍ଦ୍ଦେଶକ ସବ୍ୟସାଚୀ ମହାପାତ୍ରଙ୍କଠାରୁ । ଶ୍ରୀ ମହାପାତ୍ର ଏହାର ନିର୍ଦ୍ଦେଶନା ଦେଉଥିବାବେଳେ ଡିଓପିରେ ହୁଏନ୍ସାଂ ମହାପାତ୍ର ଏବଂ ସଙ୍ଗୀତରେ ଅଭିଜିତ୍ ମଜୁମ୍ଦାର୍ ରହିଛନ୍ତି । ଆମର ମ୍ୟୁଜିକ୍ ଏବଂ କୁମାର ପିକ୍ଚର୍ସ ଏହାକୁ ଏକ ବିରାଟ କମର୍ସିଆଲ୍ ସିନେମାର ରୂପ ଦେଉଥିବାରୁ ଧନ୍ୟବାଦ । ଆହୁରି ଅନେକ କଥା ଅଛି, ଧୀରେ ଧୀରେ ସବୁ କହିବି... । ଏବେତ ଆରମ୍ଭ ହେଲା ଅନନ୍ତାର ବଦମାସୀ । ଖାଲି ଏତିକି କହନ୍ତୁ ସତରେ ଆପଣଙ୍କୁ ଫାଷ୍ଟ ଲୁକ୍ କେମିତି ଲାଗିଲା?
ସିନେମାର ଶୁଭ ମହୁରତ୍ ଓଡ଼ିଶାର ପ୍ରସିଦ୍ଧ ପର୍ଯ୍ୟଟନସ୍ଥଳୀ ହରିଶଙ୍କର ଠାରେ ଅନୁଷ୍ଠିତ ହେବା ପରେ ସୁଟିଂ ଆରମ୍ଭ ହୋଇଛି । ମହୁରତ୍ରେ ନାୟିକା ସୂର୍ଯ୍ୟମୟୀ ମହାପାତ୍ର, କୁନା ତ୍ରିପାଠୀ, ହାସ୍ୟ ଅଭିନେତା ବିନ୍ଦୁ ଓ ଅନ୍ୟମାନେ ଉପସ୍ଥିତ ଥିଲେ । ‘ପୁଷ୍କରା’ ପରେ ଏହିଭଳି କିଛି ସିନେମା କରିବାକୁ ସବ୍ୟସାଚୀ ଅଧିକ ପସନ୍ଦ କରୁଥିବାବେଳେ ପ୍ରଥମ ଥର ନିଜ ଓଜନ ୨୮କେଜି ବଢ଼ାଇ ଏକ ନୂଆ ଲୁକ୍ ଦେଇଛନ୍ତି, ଯାହା ଇଣ୍ଡଷ୍ଟ୍ରି ପାଇଁ ଉଦାହରଣ । ଏହା ତାଙ୍କ ପାଇଁ ବି ସବୁଦିନ ଲାଗି ମନେରହିବ ।
