ଆଜାଦୀ କା ଅମୃତ ମହୋତ୍ସବ ଉଦ୍ଯାପିତ
ସ୍ୱାଧୀନତା ପ୍ରାପ୍ତିର ୭୫ ବର୍ଷ ପୂର୍ତ୍ତି ଉପଲକ୍ଷେ ୨୦୨୧ରେ ଆରମ୍ଭ ହୋଇଥିବା ‘ଆଜାଦୀ କା ଅମୃତ ମହୋତ୍ସବ’ ମଙ୍ଗଳବାର ଉଦ୍ଯାପିତ ହୋଇଛି
ONM_News
ସ୍ୱାଧୀନତା ପ୍ରାପ୍ତିର ୭୫ ବର୍ଷ ପୂର୍ତ୍ତି ଉପଲକ୍ଷେ ୨୦୨୧ରେ ଆରମ୍ଭ ହୋଇଥିବା ‘ଆଜାଦୀ କା ଅମୃତ ମହୋତ୍ସବ’ ମଙ୍ଗଳବାର ଉଦ୍ଯାପିତ ହୋଇଛି । ଏହି ଅବସରରେ ଭାଷଣ ଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କହିଛନ୍ତି ଯେ ବିଗତ ଏକ ହଜାର ଦିନ ଧରି ଚାଲିଥିବା ଏହି ମହୋତ୍ସବ ଏକ ଜନଆନ୍ଦୋଳନରେ ପରିଣତ ହୋଇଛି । ଅତୀତରେ ଦାଣ୍ଡି ଯାତ୍ରା ଯେପରି ଭାରତୀୟଙ୍କୁ ଏକାଠି କରିପାରିଥିଲା, ସେହିପରି ଅମୃତ ମହୋତ୍ସବ ମଧ୍ୟ ଲୋକଙ୍କ ମଧ୍ୟ ଅନୁରୂପ ଦେଶାତ୍ମବୋଧ ଭାବନା ସୃଷ୍ଟି କରିବାରେ ସଫଳ ହୋଇଛି । ଭରତ ଇତିମଧ୍ୟରେ ବିଶ୍ୱର ପଞ୍ଚମ ବୃହତ୍ତମ ଅର୍ଥନୀତି ପାଲଟିଥିବାବେଳେ ୨୦୪୭ ମସିହା ସୁଦ୍ଧା ବିକଶିତ ରାଷ୍ଟ୍ରର ମାନ୍ୟତା ପାଇବା ପାଇଁ ଦେଶବାସୀ ଉଦ୍ୟମ କରିବା ଜରୁରୀ ବୋଲି ମୋଦୀ ଆହ୍ୱାନ ଦେଇଛନ୍ତି ।
ଏଥିସହିତ ‘ମେରି ମାଟି, ମେରା ଦେଶ’ ଅଭିଯାନର ମଧ୍ୟ ପରିସମାପ୍ତି ଘଟିଛି । ରାଷ୍ଟ୍ର ଗଠନରେ ଯୁବଗୋଷ୍ଠୀଙ୍କ ସକ୍ରିୟ ଭୂମିକା ସୃଷ୍ଟି କରିବା ପାଇଁ ମୋଦୀ ‘ମେରା ଯୁବ ଭାରତ’ ଅଭିଯାନର ଶୁଭାରମ୍ଭ କରିଛନ୍ତି । ନୂଆଦିଲ୍ଲୀର କର୍ତ୍ତବ୍ୟ ପଥ (ପୂର୍ବନାମ ରାଜପଥ)ରେ ଆୟୋଜିତ ଏହି ଉତ୍ସବରେ ଦେଶର ବିଭିନ୍ନ ପ୍ରାନ୍ତରୁ ଆସିଥିବା ସହସ୍ରାଧିକ ଯୁବକ ଯୁବତୀ ସାମିଲ ହୋଇଥିଲେ । ମଙ୍ଗଳବାର ବିଶିଷ୍ଟ ସ୍ୱାଧିନତା ସଂଗ୍ରାମୀ ତଥା ଦେଶର ପ୍ରଥମ ସ୍ୱରାଷ୍ଟ୍ରମନ୍ତ୍ରୀ ସର୍ଦ୍ଦାର ବଲ୍ଲଭଭାଇ ପଟେଲଙ୍କ ଜନ୍ମବାର୍ଷିକୀ ପାଳିତ ହେଉଥିବାବେଳେ କର୍ତ୍ତବ୍ୟ ପଥରେ ଆୟୋଜିତ ଏହି ମହାଯଜ୍ଞ ଦେଶର ଯୁବପିଢିଙ୍କୁ ପ୍ରେରଣା ଯୋଗାଇବ ବୋଲି ମୋଦୀ କହିଛନ୍ତି । ୨୦୨୧ ମାର୍ଚ୍ଚ ୧୨ରେ ଗୁଜରାଟର ସାବରମତି ଆଶ୍ରମରୁ ‘ଆଜାଦୀ କା ଅମୃତ ମହୋତ୍ସବ’ର ଶୁଭାରମ୍ଭ ହୋଇଥିଲା ।
