ବିଧାୟକଙ୍କ ନିଲମ୍ବନରେ କଂଗ୍ରେସର ପ୍ରତିବାଦ
ପୂର୍ବତନ ଜଗତ୍ସିଂହପୁର ବିଧାୟକ ଚିରଞ୍ଜୀବ ବିଶ୍ୱାଳଙ୍କୁ ଏଆଇସିସି (ଅଖିଳ ଭାରତ କଂଗ୍ରେସ କମିଟି) ପକ୍ଷରୁ କଂଗ୍ରେସରୁ ନିଲମ୍ବନ କରାଯିବା ପରେ ଜଗତ୍ସିଂହପୁର ଜିଲାରେ ରାଜନୈତିକ ଚର୍ଚ୍ଚା ଜୋର ଧରିଛି
ONM_News
ପୂର୍ବତନ ଜଗତ୍ସିଂହପୁର ବିଧାୟକ ଚିରଞ୍ଜୀବ ବିଶ୍ୱାଳଙ୍କୁ ଏଆଇସିସି (ଅଖିଳ ଭାରତ କଂଗ୍ରେସ କମିଟି) ପକ୍ଷରୁ କଂଗ୍ରେସରୁ ନିଲମ୍ବନ କରାଯିବା ପରେ ଜଗତ୍ସିଂହପୁର ଜିଲାରେ ରାଜନୈତିକ ଚର୍ଚ୍ଚା ଜୋର ଧରିଛି । ଏହି ନିଷ୍ପତ୍ତି ବିରୋଧରେ ଜିଲା ଯୁବ କଂଗ୍ରେସ ସଭାପତି ପ୍ରଶାନ୍ତ ମଲ୍ଲିକଙ୍କ ସମେତ ଏକାଧିକ କଂଗ୍ରେସ କର୍ମୀ ସ୍ଥାନୀୟ ଥାନା ଛକରେ ପ୍ରତିବାଦ କରି ପ୍ରଦେଶ କଂଗ୍ରେସ କମିଟି (ପିସିସି) ସଭାପତି ଶରତ ପଟ୍ଟନାୟକଙ୍କ ବିରୋଧରେ କଡ଼ା ଟିପ୍ପଣୀ ଦେଇଛନ୍ତି। ସେମାନେ ପଟ୍ଟନାୟକଙ୍କ ବିରୋଧରେ ନାରାବାଜି କରିବା ସହ ବ୍ୟାନର ପୋଡ଼ିଛନ୍ତି। ଅନ୍ୟପଟେ ଜଗତ୍ସିଂହପୁର ପୂର୍ବତନ ପୌରାଧ୍ୟକ୍ଷ ବିପ୍ଲବ ଚୌଧୁରୀ କହିଛନ୍ତି, ତାଙ୍କ ରାଜନୈତିକ ଜୀବନରେ ଚିରଞ୍ଜୀବଙ୍କ ଭୂମିକା ଯଥେଷ୍ଟ। ତେଣୁ ବ୍ୟକ୍ତିଗତ ଭାବେ ଚିରଞ୍ଜୀବଙ୍କ ପ୍ରତି ଯଥେଷ୍ଟ ସମ୍ମାନ ଓ ଶ୍ରଦ୍ଧା ରହିଛି। କିନ୍ତୁ ଦଳର ଶୃଙ୍ଖଳା ଭିତରେ ପ୍ରତ୍ୟେକେ ରହିବା ଜରୁରୀ। ବ୍ୟକ୍ତି ନୁହେଁ, ଦଳ ବଡ। ଦଳର ନିଷ୍ପତ୍ତିକୁ ସମସ୍ତେ ସମ୍ମାନ ଦେବା କଥା। କାରଣ ଦଳ ଯାହା ନିଷ୍ପତ୍ତି ନେଇଛି ତାହା ବହୁ ବୁଝି ବିଚାରି ନେଇଥିବ। ଚିରଞ୍ଜୀବଙ୍କୁ ଦଳ ବହିଷ୍କାର କରିନାହିଁ। ତେଣୁ ପ୍ରତିବାଦ ନ କରି ଦେଖା ଦେଇଥିବା ସମସ୍ୟାର ସମାଧାନ କରିବା ଉଚିତ। ପିସିସି ସଭାପତିଙ୍କ ବ୍ୟାନର ପୋଡିବା ଦୁର୍ଭାଗ୍ୟଜନକ କଥା। ଯେଉଁମାନେ ଦଳ ନିଷ୍ପତ୍ତିର ପ୍ରତିବାଦ କରିଛନ୍ତି ସେମାନେ ଚିରଞ୍ଜୀବଙ୍କ ନିଲମ୍ବନ କିପରି ଉଠିବ ସେ ବିଷୟରେ ଚିନ୍ତା କରିବା କଥା। ଆଗାମୀ ନିର୍ବାଚନରେ ଚିରଞ୍ଜୀବ କଂଗ୍ରେସ ଟିକେଟରେ ପ୍ରାର୍ଥୀ ହୁଅନ୍ତୁ ବୋଲି ପ୍ରତ୍ୟେକେ ଚାହୁଁଛନ୍ତି। କିନ୍ତୁ ମହମ୍ମଦ ମୋକିମଙ୍କ ପରି ଦ୍ୱନ୍ଦ୍ୱ ଉପରୁ ପରଦା ହଟାନ୍ତୁ ବୋଲି ଚୌଧୁରୀ କହିଛନ୍ତି।
ନିକଟରେ ଭୁବନେଶ୍ୱର ଜୟଦେବ ଭବନରେ ‘ଜାନକୀ-ବସନ୍ତ ଯୋଡି ଓଡ଼ିଶା ରାଜନୀତିର ସ୍ବର୍ଣ୍ଣିମ ଯୁଗ’ ଶୀର୍ଷକ ଆଲୋଚନାଚକ୍ରରେ ଯୋଗଦେଇ ଚିରଞ୍ଜୀବ ବିବାଦୀୟ ବୟାନ ଦେଇଥିଲେ। ଏହାପରେ ତାଙ୍କ ପାଇଁ ଅଡ଼ୁଆ ବଢ଼ିଥିଲା। ଏନେଇ ଚିରଞ୍ଜୀବଙ୍କୁ ପିସିସି ସଭାପତି ପଟ୍ଟନାୟକ କାରଣ ଦର୍ଶାଅ ନୋଟିସ ଜାରି କରିଥିଲେ। ଏହାର ସନ୍ତୋଷଜନକ ଉତ୍ତର ନ ପାଇବାରୁ ସେ ଏଆଇସିସିକୁ ଲିଖିତ ଭାବେ ଅବଗତ କରିଥିଲେ। ତା’ପରେ ଏଆଇସିସି ଶୃଙ୍ଖଳା କମିଟି ଚିରଞ୍ଜୀବଙ୍କୁ ଦଳରୁ ନିଲମ୍ବନ କରିଛନ୍ତି।
