ନୀତି ଆୟୋଗ ବୈଠକ ମଝିରୁ ଉଠିଗଲେ ମମତା
ଶନିବାର ଠାରୁ ଦିଲ୍ଲୀ ଠାରେ ଆରମ୍ଭ ହୋଇଛି ନୀତି ଆୟୋଗର ଗଭର୍ଣ୍ଣିଂ କାଉନସିଲ ବୈଠକ
ONM_News
ଶନିବାର ଠାରୁ ଦିଲ୍ଲୀ ଠାରେ ଆରମ୍ଭ ହୋଇଛି ନୀତି ଆୟୋଗର ଗଭର୍ଣ୍ଣିଂ କାଉନସିଲ ବୈଠକ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ସାମିଲ ହୋଇଥିବା ପଶ୍ଚିମବଙ୍ଗ ମମତା ବାନାର୍ଜୀଙ୍କ ଆଚରଣ ଏବେ ଚର୍ଚ୍ଚାରେ ରହିଛି । ରିପୋର୍ଟ ଅନୁସାରେ ବୈଠକ ଅଧାରୁ ସେ ନିଜ ଆସନ ଛାଡି ଉଠି ଚାଲିଯାଇଛନ୍ତି ।
ପ୍ରକାଶ ନୀତି ଆୟୋଗ ବୈଠକକୁ ବହୁ ଅଣବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀମାନେ ବର୍ଜନ କରିଥିବା ବେଳେ ମମତା ବାନାର୍ଜୀ କିନ୍ତୁ ନିଜ ରାଜ୍ୟର ସ୍ୱାର୍ଥ ପାଇଁ ଏହି ବୈଠକରେ ଯୋଗ ଦେଇଥିଲେ । ତେବେ ବୈଠକରେ ତାଙ୍କୁ କହିବାକୁ ସୁଯୋଗ ଦିଆଯାଇନଥିବା ଅଭିଯୋଗ କରି ବର୍ଷିଛନ୍ତି ମମତା । ମମତାଙ୍କ କହିବାନୁସାରେ ସେ ନିଜ ରାଜ୍ୟର ସମସ୍ୟା ସଂକ୍ରାନ୍ତରେ ବୈଠକରେ ବିସ୍ତୃତ ଭାବେ କହିବାକୁ ଅନୁରୋଧ କରିଥିଲେ । ତାଙ୍କ ପୂର୍ବରୁ ଅନ୍ୟ ବିଜେପି ଶାସିତ ରାଜ୍ୟର ମୁଖ୍ୟମନ୍ତ୍ରୀମାନଙ୍କୁ ଯେଉଁଠି ସେମାନଙ୍କ ସମସ୍ୟା ଉପସ୍ଥାପିତ କରିବା ପାଇଁ ୧୫-୨୦ ମିନିଟ୍ ସମୟ ଦିଆଯାଇଥିଲା ସେତେବେଳେ ତାଙ୍କୁ ମାତ୍ର ୫ ମିନଟ୍ ସମୟ ଦିଆଯାଇଥିଲା । ତେବେ ସେ ନିଜ ରାଜ୍ୟ ପଶ୍ଚିମବଙ୍ଗକୁ କେନ୍ଦ୍ର ଅନୁଦାନ ମିଳୁନଥିବା ପ୍ରସଙ୍ଗ ଉଠାଇବାରୁ ତାଙ୍କ ମାଇକ୍ ବନ୍ଦ କରିଦିଆଯାଇଥିଲା । ତାଙ୍କୁ ଜାଣିଶୁଣି ଏପରି ଅପମାନିତ କରାଯାଇଥିବା ହୃଦ୍ବୋଧ ହେବା ପରେ ସେ ଅବିଳମ୍ବେ ବୈଠକରୁ ଉଠି ଆସିଥିଲେ ବୋଲି ମମତା ଅଭିଯୋଗ କରିଛନ୍ତି । ମମତାଙ୍କ କହିବାନୁସାରେ ଏହା କେବଳ ତାଙ୍କ ପାଇଁ ନୁହେଁ, ସମସ୍ତ ଆଞ୍ଚଳିକ ରାଜନୈତିକ ଦଳ ପ୍ରତି ଅପମାନ । କାରଣ ବହୁ ଅଣବିଜେପି ମୁଖ୍ୟମନ୍ତ୍ରୀ ବୈଠକକୁ ବର୍ଜନ କରିଥିବା ବେଳେ ସେ ଏଥିରେ ସାମିଲ ହୋଇଥିଲି । ସେ ସମସ୍ତ ଅଣବିଜେପି ଶାସିତ ରାଜ୍ୟ ପକ୍ଷରୁ ପ୍ରତିନିଧିତ୍ୱ କରିବା ପାଇଁ ଏହି ବୈଠକରେ ଯୋଗଦେଇଥିଲେ । ଏଥିରେ କେନ୍ଦ୍ର ସରକାର ଖୁସି ହେବା ପରିବର୍ତ୍ତେ ନିଜ ପାର୍ଟି, ନିଜ ସରକାର ଓ ନିଜ ନେତାଙ୍କୁ ଅଧିକ ଗୁରୁତ୍ୱ ଦେଇ ତାଙ୍କୁ ଉଦ୍ଦେଶ୍ୟମୂଳକ ଭାବେ ଅପମାନିତ କରିଛନ୍ତି ।
ମମତାଙ୍କ ଏପ୍ରକାର ଅଭିଯୋଗ ଉପରେ ସରକାରଙ୍କ ତରଫରୁ ପକ୍ଷ ରଖିଛନ୍ତି କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ସୀତାରମଣ କହିଛନ୍ତି, ମମତା ବାନାର୍ଜୀ ଯେଉଁ ଅଭିଯୋଗ କରୁଛନ୍ତି ତାହା ସମ୍ପୂର୍ଣ୍ଣ ମିଥ୍ୟା । ବୈଠକରେ ତାଙ୍କୁ କହିବାକୁ ସମ୍ପୂର୍ଣ୍ଣ ସୁଯୋଗ ଦିଆଯାଇଥିଲା । ସେହିପରି ତାଙ୍କ ମାଇକ୍ ଅଫ୍ କରାଯାଇଥିବା ନେଇ ମଧ୍ୟ ସେ ଯେଉଁ ଅଭିଯୋଗ କରୁଛନ୍ତି ତାହା ସମ୍ପୂର୍ଣ୍ଣ ଭିତ୍ତିହୀନ । ନିର୍ଦ୍ଦିଷ୍ଟ ସମୟ ପୂର୍ବରୁ ବେଲ୍ ବାଜିନଥାଏ । କିନ୍ତୁ ବେଲ୍ ବାଜିବା ପୂର୍ବରୁ ହିଁ ମମତା ନିଜ ଆସନ ଛାଡି ଚାଲିଆସିଥିଲେ । ନୀତି ଆୟୋଗ ସିଇଓ ବିବିଆର ସୁବ୍ରମଣ୍ୟମ ମଧ୍ୟ ସମାନ କଥା କହି ମମତାଙ୍କ ଅଭିଯୋଗକୁ ଖଣ୍ଡନ କରିଛନ୍ତି ।
